مش نا اللي نضعف كان خطرتي

17/5/2010, 5:18 am

قصيدة للشاعر الشاب حافظ الشيخي من شعراء مدينة اجدابيا

ارجوا ان تنال رضاكم ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,

مش نا اللي نضعف ان كان خطرتي ......... ومش نا اللي نبكي على ماضيك

مانصيرلك ياللي لغيري صرتي .... مش نا اللي نهـدد هــذي وهاذيك

مانقولك ليش وعليش غدرتي ___ حقك علي لانعاتب ولانشاكيك

ش يصير في الدنيا ان كان هجرتي ___ نا حي يافلانه بلاك وبيك

لو ف السماء ميتين فجوة درتي ___ ماعاد نشبكن ايدي في يديك

نار اخرى على ناري ابديك كبرتي ___ يانويرتي اسمله صحيح عليك

اخسارة بعد غلوه غلاي اخسرتي ___ اخسارة اسنين وقولتي هاويك

سقيتك حنان و ود شوك ثمرتي ___ ش انديرلك ، ما اثمرنشي فيك

شور الهلاك عديتي وما شاورتي ___ نا موش شوري ، تستاهلي مايجيك

كيفي ماتلاقي يافتاة لو طرتي ___ عليه تكذبي وبالصادقة يحاكيك

شور الوهم ياواهمة سافرتي ___ وسبتي الحقيقة من الجهل عاميك

ياطايحة السعد هضا عليش اقدرتي ___ بلا سوم بعتي بسوم من شاريك

من لاشيء درتك شيء بيه افخرتي ___ كيف مارفعتك نقدر انواطيك

ان روحك احسبتي بالغلا سيطرتي ___ على راك غلطانه العقل انسيك

كيفما كبرتي بالعيون صغرتي ___ كيفما صفحة فتحتها نطويك

لغيري مشيتي في مافكرتي ___ مربوحة وديري كل مايواليك

جميع مابنينا في الغلا دمرتي ___ وبالخير ياخاينة اخرى نطريك

امحيني ونا نمحاك من ذاكرتي ___ وماعاد شي نسهر على شاطيك

لو احذاي من العطش ياللي غلاي نكرتي ___ متيَ وحق الله مانسقيك

عطيتك محبة فوق ما اصورتي ___ ومن النسمة عليك نغار وين اتجيك

حسيت بيك وبلونك بعد غيرتي ___ وحسيت بانه في غلاي شريك

ما اتقول عمرك قبل بي اكبرتي ___ ع الخونة نبارك وع الخطا نهنيك

صمتي العمر كله وعليش فطرتي؟ ___ مالقيت مانقولك الا الله يهديك

***********
ان شاءالله يكون الاختيار فالمستوى المطلوب

مع التحية والتقدير للجميع