قصه واقعيه صعبه جدا

القصه حقيقيه ونعرف ابطالها شخصيا


بسم الله
رح نتكلم باللهجه العاميه
بدات القصه اتنين شباب ناوين بيطلعوا من مصراته بسافروا لمدينه تانيه عليهم لو اختصروا الطريق ومشوا بسرعه معقوله 8 الي 10 ساعات مدينه داخل ليبيا
هما قروروا انوهم يطولوها شوي ومشوا لمدن اخري يعني مشوا لطرابلس
قبل وبعدين كملوا طريقهم
رحله حلوه هادئه فرفشه انبساط من الاخير تغير جو وحتي سرعتهم مش كبيره يا دوب 140 كم في الساعه
وصلوا الي نص الطريق نزلوا في استراحات موجوده في الطريق وعبوا بنزينتهم ونزلوا في واحده من الاستراحات حتي يصلوا ويتغدوا علي تدريستهم علي الاستراحه درست بجنبهم سايره تانيه فيها اتنين شباب
كانوا مستعجلين واضح عليهم لدرجه انهم واحد نزل طلب قهاوي وحاجات خفيفه ومشي يصلي والتاني مشي يعبي في بنزينه مستعجلي واضح عليهم
جت جلستهم بجنب الشباب الاتنين عرفوهم مستعجلين وباعتبارهم انهم وصلوا قبلهم طلباتهم وصلن قبل الشباب
عرض عليهم واحد من الشباب انهم ياخدوا غداهم وقهوتهم لو مستعجلين
قاله شكلكم مستعجلين خودوا غدانا واحني عادي نطلب ونستنوا من جديد
طبعا الشباب شكروهم وقوالو لا عادي مافيش باس لو تاخروا 5 دقايق
خدوا حاجتهم وطلعوا مستعجلين
الشباب الاتنين صارت حركه قدامهم في الاستراحه ماعجبتهمش زعلوا وناضوا كملو طريقهم
اقرب مسافه بين الاستراحات والمدينه الجايه حوالي 350 كم
طريق صحراء فاضيه فيها شيل بنزينه وبوابتين امنيات بس
والباقي صحراء جرداء رمال فقط وطريق رمله
الهم طلعوا الشباب مسافه حوالي 120 كم
كانت الطريق فاضيه بعد العصروجدوا سياره مقلوبه علي جانب الطريق
علي مسافه حوالي 150 متر بجنب الطريق
سياره الشباب يلي تقابلوا معاهم في الاستراحه نزلولهم وجدوهم السياره مقلوبه وجهم كلها دم وحاله صايره فيهم
واحد منهم كان مغمي عليه والتاني بين الغيبوبه والوعي بس مش واعي في اللي صاير
حاولو الشباب يسعفوهم وكات اقرب مدينه فيها مستشفي حواي 200 كم واكتر
حطوهم في سيارتهم واسعفوهم كانت سرعتهم جنونيه يتخطوا في البوابه الاولي والبوابه التانيه مسكتهم لما عرفت شو صاير خلتهم يمشوا كانوا سمعوا في اهات والم من الشباب ودماء تنزف موقف صعب شباب زي الورود حالتهم يرتي لها
في الطريق احد الشباب المغمي عليه بدا جسمه ينتفض روحه تخرج منه ووجه كلها دماء احد الشباب المسعفين صار يبكي ويصرخ قعد يقول لي صحبه ( اجري بسرعه) وصلت سرعتهم حوالي 200 كم واكتر
مع هدا كانوا يحسوا بنفسهم انهم واقفين ما يتحركوش
بعد وفاه الاول التاني اغمي عليه نم كتر مانزف اعتقدنا انه مات
فصاح الاول ان لله وانه اليه راجعون
وصلوا للمستشفي في مدينه براك ونزلوهم الاول صح توفا والتاني قعد في العنايه حوالي 3 اسابيع في غيبوبه
وبعدين تحسنت حاله
الشاب المسعف الاول من صدمه الموقف اصيب بصدمه واترها نزل في المستشفي تلات ايام والتاني احتجز من قبل الشرطه حتي انتهت التحقيقات
موقف صعب جدا والله يبكي حتي الصخر
اترحموا علي الشاب حسام 25 سنه متزوج وعنده بنت

اللهم أغفر له وارحمه

انا لله وانا اليه راجعون

مشكور محمد

العفو شباب

العفو ميسونه

ان لله وان اليه لراجعون

اللهم اعن اهله عن فقدانهم له يارب العالمين واجعل مأواه الجنه

مشكور خوي محمد لي نقل لنا هده القصه المؤثره تقبل مروري

العفو خوتي علي المرور الطيب صحيتوا

الله يخليكم
بس انا ملاحظ مافيش حد معنااها فكر لو انه مكان شباب لاتنين المسعفين كيف كان الموقف معاهم

مشكور خوي وبارك الله فيك